Juve^Lover
Member
- إنضم
- 25 سبتمبر 2010
- المشاركات
- 14
- مستوى التفاعل
- 19
- النقاط
- 0
..
.
أخيراً و بعد طول انتظار قدرت أروح مدينة تورينو الايطالية (مدينة النادي الايطالي يوفنتوس).
في البداية و مثل بقية مواضيع السفر راح اعطيكم تفاصيل بسيطة عن السفرة بشكل عام
مدة السفرة: يومين (ليلة وحدة)
المناطق: تورينو (ايطاليا)
تكاليف السفرة: ما يقارب الـ 300 دينار (تشمل: تذكرة الذهاب و العودة ، ليلة فندق ، مواصلات ، و تذكرة مباراة يوفنتوس)
التقييم العام للسفرة: 10/9 (بسبب التجربة الي كانت)
التذاكر: لوفتهانزا (ذهاب و عودة)
.
.
بحكم عملي في ألمانيا و وصولي لبرلين قبل اسبوع تقريباً شفت إنها فرصة حلوة أكون متواجد في مباراة التتويج لنادي يوفينتوس في مدينة تورينو. فقلت أشوف شلون الأسعار لكل من التذاكر والفنادق. و قبل المباراة باسبوع تقريباً قررت أروح المباراة. تم حجز تذكرة السفر و بعدها قمت أدور تذكرة للمباراة. و كمشجع لليوفي كان عني ٣ اختيارات للحصول على تذاكر المباراة:
١- موقع النادي الرسمي
٢- موقع viagogo.com
٣- عن طريق حسابات التذاكر
بسبب عدم توفر التذاكر بالموقع الرسمي و عدم ثقتي و صعوبة الحصول عالتذاكر من موقع viagogo على الرغم من الاسعار الزينه ، قررت اتوجه لأحد الحسابات.
الحساب الي تواصلت معاه اهوا euro_tickets . الشخص ثقة و حبيب و سعره كان تقريبا مقنع و المكان كان وايد زين كرؤية و بنص الملعب.
بعدها قلت أشوف الفنادق و بصراحة الفنادق كانت أسعارها وايد مرتفعه اتوقع السبب المباراة. يعني مثلا أقرب فندق للملعب كانت ليلته تقريبا ٥٠٠ يورو ، وما كان ذاك الزود و فنادق ثانيه بعد بنفس السعر تقريباً. فقررت أسويها تجربة فريدة و اقعد بفندق يوفره موقع لمشجعين يوفنتوس aroundj.com .
صراحة الفندق (Hotel Ponte Sassi) وايد بسيط جدا و تملكه عايله ايطالية من مشجعين النادي لذلك إذا كنت تشجع اليوفي راح تستانس لان كل رواد الفندق يكونون موجودين لمشاهدة مباراة. خلال اقامتي في الفندق التقيت بـ ٣ أشخاص من الاردن ٢ من فرنسا ١ من سنغافورة ١ من قبرص و ٣ من كندا. اختلاف الجنسيات و السوالف معاهم و مشاركتهم تشجعين نفس النادي كان تجربة بحد ذاته. تكلفة الفندق ٥٠ يورو تشمل الافطار. للأسف ما صورت الفندق عدل بس اتوقع تحصلون صور عنه.
.
.
الرحلة بدأت كما ذكرت من برلين مروراً في فرانكفورت لمدة ساعة بعدها إلى تورينو. رحلتي كانت يوم السبت صباحاً في نفس يوم المباراة و وصولي لمدينة تورينو كان قبل المباراة بما يقادب الـ ٣ ساعات.
بعد وصولي لمطار تورينو مباشرةً توجهت إلى الفندق عشان احط أغراضي و منها مباشرة لملعب يوفنتوس "Juventus Stadium" مكان الحدث. في طريقي للملعب كنت مبتسم طول الوقت و مشاعر مختلفه اتوقع كل واحد يعيشها إذا رايح مكان خاطره فيه من زمان.
بعد وصولي و مقابلتي لجماهير الفريق الي كنت متفق معاهم مسبقاً من خلال موقع aroundj.com و من هالتجمع تعرف على مشجعين تقريبا من جميع قارات العالم. مثل ما قلت من قبل شعور حلو انت تقابل ناس تتشارك معاهم نفس الحب و الشغف.
من الصدف الجميله اني قابلت صديق المدونة "فيصل" قبل المباراة.
بعدها بوقت قريب قررت أدخل الملب و أخيرا و بعد طول انتظار.
.
..
..
.
هذي أجواء المباراة و صراحة كنت محظوظ اني حضرت مباراة يوفنتوس الأخيرة بالموسم ضد سامبدوريا و فازوا فيها 5 - 0 و فوق هذا مباراة التتويج بالبطولة الخامسة عالتوالي.
التتويج كان تجربة ثانية و بنفس الوقت شعور حلو غير عن التلفزيون ..
.
..
..
.
و بس جذي يكون يومي الأول في تورينو انتهى.
.
يومي الثاني في المدينة كان عبارة عن يوم لإكتشاف المنطقة بشكل سريع. مثل ما تعودت إذا كنت مسافر بروحي أو شي أسويه اني اكتشف المنطقة بس هالمرة كنت عارف وين أبي اروح. أم صاحب الفندق الي كانت تكلمني ايطالي على طول مع اني ما افهم قلت لها اني ابي اتمشى ، طبعاً بالإشارة ، قالتلي "Torino Centro".
تعتبر من أكثر المناطق السياحية و تقريبا في منتصف تورينو. من الأشياء التي تتميز فيها أغلب المدن الاوروبية و الي بوجهة نظري ما راح نقدر ننافسهم فيها اهيا العمران و اللمسة الاوروبية في المباني. تقريبا ماكو مدينة زرتها و ما حبيت مبانيها. تورينو كانت من هذي المدن.
راح آخذكم بجولة معاي في أحياء المدينة.
.
..
..
.
بعد هذي الجولة السريعه رجعت الفندق و كان عندي تقريبا 4 ساعات قبل ما أروح المطار فقررت أروح عالسريع ملعب يوفنتوس علشان اصور جم صورة. الشي الوحيد الي ما عجبني ان الملعب شوي بعيد يعني لو كنت مقرر تصور صور حلوة و قريبه يمكن ما تقدر. بس المهم اني صورت و خلصت.
مع زيارتي للملعب قررت اتمشى و اشوف الشغلات الي حول الملعب. طبعا في مجمع صغيرون يم الملعب و فيه الـ store الخاص بالنادي بالإضافة إلى المتحف الخاص بالنادي Juventus Museum و زيادة على ذلك المركز الطبي الخاص بالنادي.
وهذي جولتي السريعه حول الملعب.
.
..
..
.
وبهذا أكون انهيت وحدة من أجمل رحلاتي لهذه السنة. ويك اند سريع في ايطاليا و بالتحديد مدينة تورينو.
بس قبل ما اختم أحب انصحكم هالنصيحة. إذا حابين تروحون تورينو يفضل انكم تأجرون سيارة لان التكاسي صعب تحصلهم يم الملعب أما داخل المدينة المشي وايد أحسن. و فيما يخص الأكل البيتزا كانت كافيه.
إن شاء الله تكون تغطيتي للمباراة حازت على رضاكم و إذا عندكم أي اقتراحات لتحسين المواضيع اليايه أو تقترحون أماكن أزورها لا تقصرون بالرد.
مشكورين و نشوفكم برحلة ثانيه ان شاء الله
))